உலகம் சுற்றும் யுவதி சாரா இலங்கை வந்தடைந்தார்

தனியாக உலகை இலகுரக விமானத்தில் சுற்றிவரும், 19 வயதுடைய இளம் பெண் சாரா ரதபோர்ட் (Zarah Rutherford) நேற்று (28) இரத்மலானை விமான நிலையத்தை வந்தடைந்துள்ளார்.

உலகை சுற்றி வந்த இளம் பெண் என்ற கின்னஸ் சாதனையை படைக்க சாரா திட்டமிட்டுள்ளார். இதன்படி தனது பயணத்தின் ஒரு அங்கமாக அவர் இந்தோனேஷியாவிலிருந்து இலங்கை வந்துள்ளார்.

இந்த பயணத்தின்போது, ​​அவர் தனது விமானத்தை 52 நாடுகளில் தரையிறக்க திட்டமிட்டுள்ளார்.

கடந்த ஆகஸ்ட் 11 ஆம் திகதி பெல்ஜியத்தின் ரஸல்ஸ் நகரில் தனது சுற்றுப் பயணத்தைத் தொடங்கிய சாரா, இன்னும் மூன்று மாதங்களில் அதனை நிறைவு செய்ய எதிர்பார்த்துள்ளார் என்பது குறிப்பிடத்தக்கது.